Plantun de Prouvènço

Pèr coumpara dos planto d'encò nostre

Opuntia stricta & Plumbago europaea

Raqueto(-rigourouso)

Opuntia stricta

Cactaceae

Autre noum : Pato-dóu-diable.

Nom en français : Oponce stricte.

Descripcioun :
Aquesto raqueto nous vèn d'Americo dóu miejour e s'èi naturalisado en ribo de mar despièi de tèms. Sèmblo à Opuntia engelmannii mai si raqueto (que soun pas de fueio, mai de tijo pleno) soun mai aloungado, pu verdo e souvènt sènso pougnoun, alor que si fru, mai alounga, soun d'un rouge carmin mai viéu. Peréu fai pas jamai de pege emé l'age au contro de Opuntia ficus-indica.

Usanço :
Li flour e li fru di raqueto soun manjadis, emai aquéli d'aquesto raqueto sèmblon mens sucous. La raqueto èro deja proun utilisado pèr lis aztèque pèr sougna li plago e contro la pisso-douço. Èi peréu tounico e diuretico. Aro se retrobo dins proun de medicacioun pèr lucha contro la buerbo, lis artèri tapado e coume l'avèn di lou diabète.

Port : Aubret
Taio : 1,5 à 3 m
Fueio : ges
Tipe bioulougico : Faneroufite
Cicle bioulougico : Planto renadivo

Gènre : Opuntia
Famiho : Cactaceae

Coulour de la flour : Jauno
Petalo : >6
Ø (o loungour) flour : 5 à 6 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero
Jun à avoust

Liò : Pendis proche la mar - Roucas
Estànci : Termoumediterran à Mesoumediterran
Couroulougi : Óurigino Meissique e Óurigino Americo dóu miejour
Ref. sc. : Opuntia stricta (Haw.) Haw., 1812

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.